ໜ້າຫຼັກ

ກ່ຽວກັບພວກເຮົາ

ຂ່າວ ແລະ ກິດຈະກຳ

ນິຕິກຳ

ສື່ ແລະ ສິ່ງພິມ

ຕິດຕໍ່ພວກເຮົາ

ຂ່າວສານ
  • Register
ວັນສຸກ, 19 ຕຸລາ 2018 00:00

ຈັດກອງປະຊຸມເຜີຍແຜ່ວຽກງານມາດຕະຖານເນື່ອງໃນວັນມາດຕະຖານສາກົນ ປະຈຳປີ 2018

ໃນຕອນເຊົ້າຂອງວັນທີ 18  ຕຸລາ 2018 ນີ້ ທີ່ສະຖາບັນຄຸ້ມຄອງວິທະຍາສາດ ແລະ ເຕັກໂນໂລຊີ, ນະຄອນຫຼວງວຽງຈັນ ໄດ້ມີການຈັດກອງປະຊຸມສຳມະນາກ່ຽວກັບການເຜີຍແຜ່ວຽກງານມາດຕະຖານ ເນື່ອງໃນໂອກາດສະເຫຼີມສະຫຼອງວັນມາດຕະຖານສາກົນ ປະຈຳປີ 2018, ພາຍໃຕ້ຫົວຂໍ້ “ຄວາມສຳຄັນຂອງວຽກງານມາດຕະຖານຕໍ່ກັບການພັດທະນາເສດຖະກິດ-ສັງຄົມ ໃນການເຊື່ອມໂຍງພາກພື້ນ ແລະ ສາກົນ ໃນ ຍຸກ ການປະຕິວັດອຸດສາຫະກຳ ຄັ້ງທີ 4”  ກອງປະຊຸມສຳມະນາຄັ້ງນີ້ ໄດ້ຈັດຂື້ນໂດຍ ກົມມາດຕະຖານ ແລະ ວັດແທກ, ກະຊວງວິທະຍາສາດ ແລະ ເຕັກໂນໂລຊີ ຮ່ວມກັບ ສະພາອຸດສາຫະກຳ ແລະ ການຄ້າແຫ່ງຊາດລາວ, ຊຶ່ງໄດ້ຮັບກຽດເປັນປະທານກ່າວເປີດກອງປະຊຸມໂດຍ ທ່ານ ບຸນຕີ ທະມິດ ຮອງລັດຖະມົນຕີ ກະຊວງ ວິທະຍາສາດ ແລະ ເຕັກໂນໂລຊີ, ໃນກອງປະຊຸມໄດ້ມີນັກສຳມະນາກອນ ຜູ້ຕາງໜ້າ ຈາກພາກລັດ ແລະ ພາກເອກະຊົນທີ່ກ່ຽວຂ້ອງເຂົ້າຮ່ວມ

          ດັ່ງທີ່ໄດ້ຮູ້ ກັນແລ້ວວ່າ ກະຊວງວິທະຍາສາາດ ແລະ ເຕັກໂນໂລຊີ, ກົມມາດຕະຖານ ແລະ ວັດແທກ ແມ່ນອົງການທີ່ເປັນຕົວແທນອົງການມາດຕະຖານແຫ່ງຊາດ ຂອງ ສປປ ລາວ ຊ່ຶງໃນໄລຍະຜ່ານມາໄດ້ເອົາໃຈໃສ່ສົ່ງເສີມ ແລະ ພັດທະນາວຽກງານມາດຕະຖານ ໂດຍການໂຄສະນາເຜີຍແຜ່, ຊຸກຍູ້ສົ່ງເສີມສ້າງຈິດສຳນຶກ ເພື່ອໃຫ້ສັງຄົມໄດ້ຮັບຮູ້ ແລະ ການນຳໃຊ້ເຕັກໂນໂລຊີ ນະວັດຕະກຳທີ່ກ້າວໜ້າເຂົ້າໃນການຜະລິດ, ຜູ້ປະກອບການ ແລະ ນຳໃຊ້ໃນຊີວິດປະຈຳວັນ, ເພື່ອປົກປ້ອງ ສຸຂະພາບ, ສິ່ງແວດລ້ອມ, ອີກທັງຍັງເປັນການສົ່ງເສີມຜະລິດຕະພັນໃຫ້ມີຄວາມເທົ່າທຽມກັບພາກພື້ນ ແລະ ສາກົນ.

ຈຸດປະສົງ ຂອງການຈັດກອງປະຊຸມສຳມະນາຄັ້ງນີ້ກໍ່ເພື່ອເຜີຍແຜ່ການຈັດຕັ້ງປະຕິບັດວຽກງານມາດຕະຖານ ແລະ ວັດແທກ ແລະ ວຽກງານທີ່ຕິດພັນກັບມາດຕະຖານ ໃຫ້ແກ່ພາກທຸລະກິດ ເພື່ອສ້າງຄວາມຮັບຮູ້, ຄວາມສຳຄັນຕໍ່ການພັດທະນາເສດຖະກິດ-ສັງຄົມ ແລະ ແລກປ່ຽນບົດຮຽນກັບພາກທຸລະກິດ ກ່ຽວກັບວຽກງານດັ່ງກ່າວ, ໃນກອງປະຊຸມດັ່ງກ່າວນີ້ແມ່ນຈະໄດ້ຮັບຟັງການສະເໜີບົດຈາກບັນດາຊ່ຽວຊານທັງວຽກງານດ້ານມາດຕະຖານ, ຄຸນນະພາບ ແລະ ວັດແທກ, ວຽກງານ ການນຳເຂົ້າ ແລະ ສົ່ງອອກ, ວຽກງານປົກປ້ອງຜູ້ຊົມໃຊ້ ແລະ ການດຳເນີນທຸລະກິດ ຂະໜາດກາງ ແລະ ຂະໜາດນ້ອຍ ທີ່ກ່ຽວຂ້ອງກັບມາດຕະຖານ, ນອກນັ້ນ ຍັງໄດ້ຮັບຟັງການບັນຍາຍກ່ຽວກັບປະສົບການນຳໃຊ້ມາດຕະຖານສາກົນ ເຂົ້າໃນການດຳເນີນທຸລະກິດຂອງບັນດາບໍລິສັດ ເພື່ອ ປຶກສາຫາລື ແລະ ແລກປ່ຽນຂໍ້ມູນ ຊຶ່ງກັນ ແລະ ກັນ ເພື່ອໃຫ້ເຊື່ອມໂຍງກັບ ພາກພື້ນ ແລະ ສາກົນ ໂດຍສະເພາະແມ່ນ ການປະຕິວັດອຸດສາຫະກຳຄັ້ງທີ 4 ໃນຍຸກປະຈຸບັນ.

ພາບ ແລະ ບົດຂ່າວ: ທ ພຸດທະຈັນ ຊັບທະວີ